ꐞꊂꉂꏣꈜꀕꅼꇻꀕ
ꐙꈌꇐꏣ/ꁱ
ꐙꇐꑸꆀ/ꀘ
ꌶꐞꀐ，ꇯꍝꃅꐞꀐ。ꇀꄮꇬꋓꉪꀋꁨ，ꑠꃅꏛꃅꀕꄉꌶꐞꁧꑵꉬꎻꀋꈁ，ꈜꀕꇈꀿꇁꉚꃀꇁꉚꌟꃅ，ꈍꄮꑲꆀꌶꅐꁧꀋꐚꀐꉂꇁꉚꅸꈁꅗꃺꀙꀕ。ꌶꐞꀐ，ꌶꐞꀐ。ꃅꈎꃅꆪꀄꂼꌟꃅꂻꈤꁧꅊꇈ，ꃅꑍꃅꉖꃅꆗꌟꃅꆗꐥꏽꅊꇈ，ꉜꇊꂾꆏꃅꐎꌕꈎꑠꃅꀋꋓꀋꉪ、ꀋꌋꀋꏢꃅꈢꋒꁧꀐ。ꌶꐞꀐ，ꌶꐞꀐ。ꉢꑞꃅꑓꁴꑓꇬꇉꀋꐚꀐꉂꇬꆏ，ꉡꆹꉠꌶꅉꀉꂿꌋꆀꐮꐞꁧꂯꄉꀐꌠꉬꅊꇈ，ꉡꆹꉠꂘꃀꌋꆀꐮꐞꁧꂯꄉꀐꌠꉬꅊꇈ，ꉡꆹꉠꌷꐋꌋꆀꐮꐞꁧꂯꄉꀐꌠꉬꅊꇈ，ꉡꆹ……。ꇀꄮꇬ，ꅽꉪꑠꈨꑌ，ꋍꂷꋍꄷꃄꇖꄹꊂꄉꇁꌊꌶꅉꈬꊂꇬꄉꐯꏑ，ꆎꑌꅽꉌꃀꉪꐨꁤꇅꀕꌠꀺꂿꄷꄉꇁ，ꉡꑌꉠꐥꐨꈝꃀꎵꑳꀕꌠꄻꂿꄷꄉꇁ。ꀋꌧꆗꑍꍈ，ꄚꄉꌶꆏꌷꐋꐛ，ꌷꐋꉂꏣꁦꀑꂚꃨꌟꃅꃨꈍꀕꆹꃲ；ꀋꉜꃪꑍꁕ，ꄚꄉꉜꆏꃄꁕꊨ，ꌧꇐꅿꁮꅉꃴꇗꂷꌟꃅꍅꇙꀕꆹꃲ。ꊨꄹꉇꊨꆹꐪ，ꊨꈌꊱꆺꀕ，ꂿꄹꉇꂿꆹꐪ，ꂿꈌꎃꑐꀕ，ꌷꄹꉇꌷꆹꐪ，ꌷꇐꉙꎆꀕ。ꅽꉪꂘꃀꉙꇁꂘꅇꐝꄧꀕꌠꐊꄉ，ꆎꐂꉠꃀꅞ，ꆏꄑꉡꇇꀨ，ꆎꏮꉢꉚꃅ；ꅽꉪꂘꃀꍗꇁꀮꅇꑖꈈꀕꌠꐊꄉ，ꆎꋯꉠꈌꊐ，ꆏꉉꉢꒉꏽ，ꆎꍣꉡꇰꃅ；ꅽꉪꂘꃀꉂꇁꑟꅇꐓꂿꀕꌠꐊꄉ，ꃺꃶꀁꑳꌡ，ꂛꊨꅫꃀꌡ，ꃺꃀꑌꂵꌡ。ꁬꃷꌕꉐꌟꃅꈜꋍꏢꑌꍬꋺ，ꌧꇐꈜꈴꉜꄉꑌꍬꋺ，ꂽꑼꌕꉐꌟꃅꅇꋍꇬꑌꅲꋺ，ꂘꃀꂘꅇꈴꄉꑌꅲꋺ。ꌷꐋꇆ， ꅽꉪꑠꈨꉌꇿꇁꄹꉇ，ꀉꂿꐥꀋꎺ，ꋍꃀꁨꀋꑌꉌꂵꄅꀋꑌ，ꀒꆷꃅꄉꉜ，ꀀꄩꊿꀋꐥ，ꀀꇂꃴꒉꐑꀋꁖꑴꄷ，ꄇꃅꄇꀋꉆ，ꄇꏣꆼꁠꈢ，ꏣꃅꏣꀋꉆ，ꏣꌺꇂꈪꈭꑌꋺ；ꌷꐋꇆ，ꅽꉪꑠꈨꉌꎭꇁꄹꉇ，ꀉꂿꎮꑑꅉ，ꋍꏣꌌꏣꈘꄸꏣꌋꏡꈢ，ꀑꈎꂣꈓꇱ，ꑓꁴꄧꊰꀕ，ꀀꃀꈝꂾꇬꀋꁮꑴꄷ，ꁈꋍꁈꆽꀕ，ꀉꂿꅩꆽꀕ，ꎭꃃꀨꆽꀕ，ꈛꅂꂳꆽꀕꑌꋺ。ꀊꉘꉪꀋꐚ，ꃆꐳꄔꀋꐽ。ꀉꃨꑍꀮꃨꐪꐊꀋꉆ，ꉌꃀꑍꂷꑋꄟꌡꀋꉆ，ꌶꌺꀋꌷꆏꀋꌧ，ꇌꉘꀋꁱꆏꀋꑳꄷꀋꐯꐨꀋꁮ，ꅽꉪꇬꂾꉪꐨꐯꌟꑌ，ꊁꇁꃅꐨꐯꀋꌡꅊꇈ。ꄚ，ꃰꊿꐛꐯꌟ，ꉪꇐꐯꀋꌡ，ꅐꅑꐛꐯꌟ，ꂾꃚꐯꀋꌡꅊꇈ，ꋍꈨꋋꈨꆏꉌꃀꑋꄟꂄ，ꌷꇐꈜꈴꇬꊋꋠꏢꅝꐨꑞꐥꑌꄝꇬꀋꎭꃅꉌꊢꂘꅇꅲ，ꀋꀀꀋꑌꃅꊋꇤꌧꇐꌷꇈ，ꄽꂫꊌꐨꐛꂨꀕ；ꋍꈨꋋꈨꆏꉌꃀꑌꀋꐽ，ꌞꊿꃅꋩꂴꐊꆏꋌꂷꏦꋩꊁꈹꑞꑌꀋꅲꃅꒉꇸꈄꀕꊐ，ꉉꆹꉇꆹꅍꎭꈓꀉꄂꉘꇉꇈ，ꄽꂫꊌꐨꆏꋍꍈꀋꇎꀕꃅꐙꏭꐛ。ꄚꀋꏦꇆ，ꋌꊂꐥꐨꇬꄺꀱꄺꑣꄉꑌꇐꑲꇐꉾꃅꃪꃅꐥꑲꆏ，ꌩꄹꏢꒉꌌꒈꆏꅶꁉꅞꆏꅞꍤꁆꅞꆏꅞꄡꑟ。ꌶꐞꀐ，ꌶꐞꀐ。ꀋꐞꀋꉆꄮꑟꀐ，ꂘꃀꉙꇁꂘꅇꅲꀋꌐꑴꌦ，ꋋꑌꀋꐞꀋꉆꃲ；ꌶꅉꀉꂿꉂꏣꄜꀋꌐꑴꌦ，ꋋꑌꀋꐞꀋꉆꃲ；ꌷꐋꉂꑟꉉꀋꌐꑴꌦ，ꋋꑌꀋꐞꀋꉆꃲ。ꌶꐞꀐ，ꌶꐞꀐ。ꑌꌠꀅꌳꑌ，ꉠꉂꌠꂘꃀꀅꌳꑌ，ꉠꌶꅉꀉꂿꀅꌳꑌ，ꁧꌠꀅꌳꁧ，ꉠꑟꌠꌷꐋꀅꌳꁧ。ꋌꊂꈝꃀꎴꌠꊁꆹꐥꑴꌦ，ꅽꉪꉂꅇꄜꀋꌐꌠꀅꌳꀅꌳꄜꂿꂸ，ꅽꉪꑟꅅꉉꀋꌐꌠꀅꌳꀅꌳꉉꂿꂸ！ꌶꐞꀐ，ꇯꍝꃅꐞꀐ。ꏃꇁꎭꌠꑵꉙꋍꊱꇈꋍꊱ，ꉙꇁꂘꌠꉂꅇꋍꇬꇈꋍꇬ，ꐞꂯꁧꂯꑓꁴꋍꄩꇈꋍꄩ……。ꋋꑌꐋꐞꌠꀋꉬꈛꐞꌠꄹ，ꐞꊂꉂꏣꀊꅰꈜꀕꅼꎂꀕ！
网友评论
网友评论仅供其发表个人看法，并不表明我司立场
暂无评论
